കണ്ണൂർ: വധശ്രമകേസില്‍ കവരത്തി സെഷന്‍സ് കോടതിയുടെ ശിക്ഷ നടപ്പാക്കുന്നത് ഹൈക്കോടതി മരവിപ്പിച്ചതിനെ തുടർന്ന് മുൻ ലക്ഷദ്വീപ് എം.പി മുഹമ്മദ് ഫൈസൽ ജയിൽ മോചിതനായി. വൈകുന്നേരത്തോടെയാണ് എം.പി മോചിതനായത്. ജയിൽ പരിസരത്ത് പാർട്ടി പ്രവർത്തകരുടെ തിരക്കായിരുന്നു.
ലക്ഷദ്വീപ് ജില്ലാകോടതി വിധിച്ച പത്ത് വര്‍ഷത്തെ തടവ് ശിക്ഷയാണ് ഹൈക്കോടതി മരവിപ്പിച്ചത്. വധശ്രമകേസില്‍ കവരത്തി സെഷന്‍സ് കോടതി ശിക്ഷവിധിച്ചത് മരവിപ്പിക്കണമെന്നും കീഴ്‌ക്കോടതിയുടെ കണ്ടെത്തല്‍ റദ്ദാക്കണമെന്നും ആവശ്യപ്പെട്ട് പ്രതികള്‍ നല്‍കിയ അപ്പീല്‍ ഹര്‍ജിയിലാണ് ഹൈക്കോടതി ഉത്തരവ്. കവരത്തി കോടതി കുറ്റക്കാരനാണെന്ന് കണ്ടെത്തിയ നടപടിയും ഹൈക്കോടതി സ്‌റ്റേ ചെയ്തു. ജസ്റ്റിസ് ബെച്ചുകുര്യന്റെ ബെഞ്ചാണ് വിധി പറഞ്ഞത്.