DweepDiary.com | ABOUT US | Sunday, 23 January 2022

വികസനം തൊഴിൽ നശിപ്പിക്കുകയല്ല, നൽകുകയാണ് വേണ്ടത് - ഡോ. സ്വാദിഖ്

In interview Special Feature Article BY AMG On 14 November 2021
ലക്ഷദ്വീപ് വികസന മേഖലയിൽ ചെയ്യാവുന്ന കാര്യങ്ങൾ എന്തൊക്കെയെന്ന് വിശദീകരിക്കുകയാണ് ലക്ഷദ്വീപ് സേവ് ഫോറം കൺവീനറും രാഷ്ട്രീയനേതാവുമായ ഡോ. സ്വാദിഖ്. "ലക്ഷദ്വീപുകാർക്ക് വേണ്ട വികസനം എന്ത്" എന്ന അന്വേഷണത്തിന്റെ ഭാഗമായി ദ്വീപ് ഡയറിക്ക് വേണ്ടി ഈ അഭിമുഖം തയാറാക്കിയത് അബു ആന്ത്രോത്ത്.

വളരെക്കാലമായി നിലനിൽക്കുന്ന നിലവിലുള്ള അവസ്ഥകളുടെ വേദനാജനകമായ പരിവർത്തനമായാണ് ഒരു ദ്വീപുവാസി എന്ന നിലയിൽ ഞാൻ ഇപ്പോഴത്തെ സാഹചര്യത്തെ വിലയിരുത്തുന്നത്. അത് മോശമാണോ നല്ലതാണോ എന്ന് കാലം മാത്രമേ പറയൂ. എന്നാൽ ഇത്തരത്തിൽ അഭൂതപൂർവമായ പിരിച്ചുവിടൽ മൂലം ജനങ്ങളിൽ സാമ്പത്തിക അസ്ഥിരതയും ഭീതിയും സൃഷ്ടിച്ചു എന്നുറപ്പാണ്.

പരിസ്ഥിതിക്കും സംസ്‌കാരത്തിനും കോട്ടം തട്ടാതെയുള്ള ചൂഷണരഹിതമായ സുസ്ഥിര വികസനമാണ് നമുക്ക് വേണ്ടത്. വികസനം ഇല്ലെങ്കിൽ തൊഴിലവസരങ്ങൾ സൃഷ്ടിക്കുക പ്രയാസമായിരിക്കും. അതോടൊപ്പം അത് കോർപ്പറേറ്റുകൾക്കല്ല, തദ്ദേശീയർക്ക് പ്രയോജനപ്പെടണം.

ഒരു വികസനം ആരംഭിക്കുമ്പോൾ, തീർച്ചയായും പൊതുജനങ്ങൾക്ക് ചില ബുദ്ധിമുട്ടുകൾ ഉണ്ടാകും. ലക്ഷദ്വീപിന്റെ കാര്യത്തിൽ നമ്മൾ ഇപ്പോൾ നേരിടുന്നത് മറ്റൊരു സാഹചര്യമാണ്. ഞങ്ങൾ വികസനത്തിന്റെ പാതയിലാണെന്ന് ഒരുവശത്ത് സർക്കാർ പറയുന്നു, മറുവശത്ത് അവർ കരാർ ജീവനക്കാരെ പിരിച്ചുവിടുകയും എല്ലാ പ്രാദേശിക കരാറുകളും ടെൻഡർ ജോലികളും അവസാനിപ്പിക്കുകയും ചെയ്യുന്നു. ജനങ്ങൾ പരിഭ്രാന്തിയിലാണ്. എനിക്ക് തോന്നുന്നത്, ആര്‍ക്കും അറിയാത്ത ഒരു കാര്യം ചെയ്യാൻ സർക്കാർ തിടുക്കം കാണിക്കുന്നു, അടിസ്ഥാന യാഥാർത്ഥ്യവും ജനങ്ങളുടെ ബുദ്ധിമുട്ടുകളും മനസ്സിലാക്കുന്നതിൽ അധികാരികൾ പരാജയപ്പെട്ടു.

ഇവിടെ ചില പുതിയ വിദ്യാഭ്യാസസ്ഥാപനങ്ങൾ ഞാൻ ശ്രദ്ധിച്ചിട്ടുണ്ട്. എന്നാൽ അതിന്റെ അഫിലിയേഷൻ, അംഗീകാരം, സ്റ്റാഫ് അംഗബലം എന്നിവയെക്കുറിച്ച് എനിക്ക് സംശയമുണ്ട്. സ്ഥാപനങ്ങൾക്ക് ശരിയായ അടിസ്ഥാന സൗകര്യമില്ല. ദ്വീപിൽ നിന്ന് ആർക്കും അധ്യാപനരംഗത്ത് ജോലി കിട്ടിയില്ല.

വികസനം എന്നാൽ കെട്ടിട നിർമാണം മാത്രമല്ല. അത് തൊഴിൽ സൃഷ്ടിക്കണം. അതാണ് പരമമായ ലക്ഷ്യം. സാമ്പത്തിക സ്ഥിരതയും വളർച്ചയുമാണ് വികസനത്തിന്റെ സൂചകങ്ങൾ.

മത്സ്യബന്ധനം, തെങ്ങുമായി ബന്ധപ്പെട്ട വ്യവസായങ്ങൾ, വിനോദസഞ്ചാരം എന്നീ മേഖലകളിൽ നമുക്ക് വികസനം ആവശ്യമാണ്. പ്രാദേശിക സംരംഭകർക്ക് സർക്കാർ മുൻഗണന നൽകുകയും പ്രാദേശിക ഉൽപ്പന്നങ്ങൾ പ്രോത്സാഹിപ്പിക്കുന്നതിന് സബ്‌സിഡിയും ഗ്രാന്റുകളും നൽകുകയും വേണം. പ്രാദേശിക ഉൽപ്പന്നങ്ങളുടെ വിപണി കണ്ടെത്തേണ്ടത് അനിവാര്യമാണ്. MSME യുടെ കീഴിൽ SFRUTI എന്നൊരു പദ്ധതിയുണ്ട്. ഇത് പ്രാദേശിക മത്സ്യത്തൊഴിലാളികൾക്കും നാളികേര കർഷകർക്കും മൂല്യവർധിത ഉൽപ്പന്നങ്ങൾ ഉൽപ്പാദിപ്പിക്കുന്നതിനും വിപണനങ്ങൾക്കും അവസരമൊരുക്കുന്നു. കർഷകരുടെയും മത്സ്യത്തൊഴിലാളികളുടെയും സൊസൈറ്റികൾക്ക് ഇത് ആരംഭിക്കാം. സർക്കാർ 5 കോടി വരെ സബ്‌സിഡി നൽകും.

നമ്മള്‍ നാളികേരം കൊണ്ട് അനുഗ്രഹിക്കപ്പെട്ടവരാണ്. തെങ്ങിന്റെ ഓരോ ഭാഗവും ഉപയോഗപ്രദമാണ്. തെങ്ങൊല കൊണ്ട് സ്ട്രൊ ഉണ്ടാക്കാം. അതിൽ നിന്ന് ഡ്രൂമുകൾ നിർമ്മിക്കാം. തെങ്ങിന്റെ മട്ടൽ വേലികെട്ടാൻ ഉപയോഗിക്കാം. കയർ, വെളിച്ചെണ്ണ, കൊപ്ര, കൊപ്ര പൊടി, തെങ്ങിൻതൈ, തെങ്ങിൻതടി മുതലായവ ലക്ഷദ്വീപിന് പുറത്തേക്ക് കയറ്റുമതി ചെയ്യാം.

അച്ചാർ, ഉണക്കിയ ചൂര, അസംസ്കൃത മത്സ്യം എന്നിങ്ങനെ മത്സ്യം കയറ്റുമതി ചെയ്യാൻ കഴിയും. മത്സ്യത്തിന്റെ പാഴ്വസ്തുക്കളിൽ നിന്ന് പല ഉപോൽപ്പന്നങ്ങൾ ഉണ്ടാക്കാം. കടൽ വെള്ളരി കൃഷി, ലഗൂണിൽ വലകെട്ടിയുള്ള മീൻ കൃഷി, മീൻ വിരിയിക്കൽ, കടൽപ്പായൽ കൃഷി എന്നിവ വിപുലമാക്കണം.

സാംസ്‌കാരിക ടൂറിസമാണ് ലക്ഷദ്വീപിന് അനുയോജ്യം. വിവിധ ദ്വീപുകളിൽ തദ്ദേശവാസികളുടെ കീഴിലുള്ള ചെറിയ യൂണിറ്റുകൾ തദ്ദേശീയർക്ക് കൂടുതൽ വരുമാനം സൃഷ്ടിക്കും. ജനവാസമില്ലാത്ത ദ്വീപുകളിൽ വൈദ്യുതി, വെള്ളം, റോഡ് തുടങ്ങിയ അടിസ്ഥാന സൗകര്യങ്ങൾ വികസിപ്പിക്കാനും പിപിപി മാതൃകയിൽ ടൂറിസം വികസിപ്പിക്കാനും സർക്കാരിന് കഴിയും.

സ്വയം സഹായ സംഘങ്ങൾക്ക് അവരുടെ ഉൽപ്പന്നങ്ങൾ കപ്പൽ കാന്റീനുകളിൽ വിൽക്കാം.

ഗതാഗത മേഖല കൂടുതൽ വികസിക്കേണ്ടതുണ്ട്. ദിവസങ്ങളോളം കാത്തുനിൽക്കാതെ യാത്ര ചെയ്യാൻ ആഗ്രഹിക്കുന്നിടത്തെല്ലാം യാത്ര ചെയ്യാൻ ആളുകൾക്ക് കഴിയണം. ഇന്റർ ഐലൻഡ് കണക്റ്റിവിറ്റി വർദ്ധിപ്പിക്കണം. ദൈനംദിന കണക്റ്റിവിറ്റി ആയിരിക്കണം നമ്മുടെ ലക്ഷ്യം.

നമ്മുടെ ആരോഗ്യ മേഖലയും അടിസ്ഥാന സൗകര്യങ്ങളും ഇപ്പോൾ അപര്യാപ്തമാണ്. എല്ലാ ദ്വീപുകളിലും നമുക്ക് കൂടുതൽ സ്പെഷ്യലിസ്റ്റുകളും ഉപകരണങ്ങളും ആവശ്യമാണ്. മൊബൈൽ ഹോസ്പിറ്റലിന്റെ സാധ്യതകൾ നമ്മൾ അന്വേഷിക്കണം. കാർഡിയാക്, ന്യൂറോ, ഗൈനക്ക് എന്നിവ എല്ലാ ദ്വീപുകളിലും നിർബന്ധമാണ്. അത്തരം സേവനങ്ങൾ ദ്വീപുകളിൽ നൽകാൻ കഴിയണം.

SHARE YOUR FEEDBACK

RECENT IN THIS CATEGORY